لمّا لمحتو طلّ صرتْ مْلَبَّكِة
وعرفتْ قصدو وقلتْ بَدّو يشتكي
فتَّشتْ عَ كلمة تَ إفتحلو حديث
وقفتْ ووقف وتْنَينّا نسينا الحكي
ومن يومها عم نلتقي ونقعُد سَوى
مدري الصدف بتسوقْنا مدري الهَوى
حَلّو بقى يفهم رح يهبّ الهَوى
ضيعان ما بيخبِّروا إنّك ذَكي
***
ردّي مَنديلِك ردّي
بيضا والشمس حدّة
بُكرا بيِجي مَحبوبك
وبيلاقيكِ مسْوَدِّة
***
ردّي ردّي الشمسية
خلّيها ترفّ عْلَيِّي
لمّا عيونك بتفَيِّي
وْراق الزنبق بتنَدِّي
***
في لِنا يا حُبّ خيمِة عَ الجَبَلْ
ناطِرَة تَ نْزورها بْليلة غَزَلْ
راكِعَة الغيمات عند بْوَابِها
وتارِكِة النجمات عَ سطحا قُبَلْ
في لِنا يا حُبّ خيمِة في لِنا
***
ومزهرية وورد أبيض عندِنا
ووَحدِنا بْهالجرد عَ حدود السما
نحنا وإنت وباقة غْناني هنا
***
يا حلوة اللي بَيتِك فَوق
صوبك عم ياخدني الشوق
عم حاكيكِ بْلطف وزَوق
بحياتِك لا تحتَدِّي