كلٍ وجرحه.. رضي والا على كيفه

يا ليتني في بعَض حالي على كيفي

وقتي وانا اخبر بصكاتي على سيفه

والمشكل اني قليلاتٍ محاريفي

قلت افضح الوقت يا قلبي وتعنيفه

قال اسكب العشق لو قفوا مواليفي

قلت الهوى لذة احبابه تحاسيفه

طبعه... وانا لذتي فرقا تحاسيفي

اصاحب الوقت وامشي منه في خيفه

والعوق ما تاصله فزعة معاريفي

هذي على الحال سيماه وتكاليفه

والواقع انه يبي حصري وتكتيفي

وارهبني الظل .. تسرقني تجاويفه

لا يستمع لي .. ولا ينسى سواليفي

لا ني حديد النظر واستوعب الشيفه

ولا هو عزاز الوطا واقطع مشاريفي

اتعبني الظل واعيتني تخاريفه

يا قوة الله.. وهو يعرف تواصيفي