وشفيك ساكت يا يبه ؟ وين السوالف يا يبَه ؟

ضحكتْك بالدنيا ترى .. هوّنها و المولى كبير

وين الربع ماشوفهم ؟ ما شوف بالنار إحطبَه

صمتك يعذّبني كثير .. يالحرّ هذا ما يصير

أدري النزاهة كايدة .. وأدري المبادئ متعبة

وأدري بخاطرْك إنكسر .. من يوم قالوا لك .. فقير

ما دمت ما تظلم أحد .. ولا إنت مطلوب إرقبه

قل يالله الحمد أشكرك .. يالرازق الفرد القدير

جمعت مالك من تعب .. يوم إنّ غيرك ينهبه

تغار لحدٍ يجرحك .. يوم إنّ غيرك ما يغير

يا بوي نارك شبّها .. عط كلّ عاني مطلبه

لا تنزعج يا أنزه أبو .. لسّاعها الدنيا بخير

وشفيك ساكت يا يبه ؟ وين السوالف يا يبَه ؟

ضحكتْك بالدنيا ترى .. هوّنها و المولى كبير

لا يا بعد راس ولِدكْ .. يا من شموخك مكسبه

ما عاد ثوبك رقعتِك .. وما عاد مجلسك الحصير