انبيع الشيح ونروم الخلا
او لا نواطيش خشمى للوطا
انبيع الشيح والمنبوت زَيّا
والترفاس واصناف الحطيّا
واملاك الجد فى (هون)السخيّا
انتاج اثمارها لنا دواء
ونحرث فى وداوينن غنيّا
ان رويت الارض من غيض السماء
انعيش بتمر ومعاه الميّا
او لانبصمش بصمة فى الخفا
نبدا كيف بويا له قضيّا
وقت الضيم من وطنا جلا
كنّز كيف تكنيز الثريا
اللى عالنجم ديما لامعا
او قام الفرض وصى به نبيّا
او شرع الله ما عنا بطا
ولا نركعش للنفس الدنيا
واحنا بشر خالقنا سواء
يرحمنى برحمته ان ضاقت عليّا
عطّاى وما إمِنّ من العطاء
نحسن للعباد/او نحفظ ورث قاموا با أجداد
او مانبداش كى نار الوقاد/هلّى فيد خلاته اهباء
دوم نعيش وافى للمراد
وقفت عز معروف الحياء
بَيع الشيح مايعيب الجواد
او لايواطيش من وزن الفتا
وانذكر دوم من ليهم سداد
ومن فى عكسهم سَدوَا جرا
عزيز النفس فكرى كان ساد
نسمو بيه وعم الهناء
ردى الاصل بؤرة للفساد
قصير النظر محدود المدا
نبقى دوم شامخ للعناد
عندى البُعد والدانى سواء
او لا نهتز كى بعض الوغاد
ولانرتد من جافى جفاء
ولاننقاد ناقع فى المزاد
او لا نشتط من عوية جرا
ونبنى مجد وانصون الامجاد
وبعون الله لنا ثابتا
نركن للعناد/بين اجبود فى وسط السواد
منازل هللى رادها ارواد/شموخ اجبالها ونخله سوا
حكيم عليم فصلها او ساد
تنظرها تقول بانيها بناء
الها فجوات مربى للوداد
تزاين فيها منبتها عفا
اساوت كلها لونها رباد
اذراها فوق منها ناصبا
ومعاها حجل مايعرف اقياد
وقت ايزوم تهتز الوطا
اتشيل الذيل والرقبه عقاد
تنضرها اتقول ها وايت لفا
عبسها ايفوح من خير لسناد
كماعطارعطره ناشرا
ومعاها سيد مايعرف ارقاد
اتعز عليه متولع ابها
يجلب حشوها ان نقص الزاد
اويعزم كان جاتا صائبا
نديد او ما ايخالف فى لنداد
اللى للند بالحكم قسا
او ماينعد فى احساب لاعداد
اللى للنقص ماهم للوفاء
ربت عز على البادى اشداد
ثقيل الروز صابر على القضاء
وانخش الدراب
وننزل وين ما ناجد صواب
طب البشر ناتج من العشاب
وطبى بُعد من لا له عناد
مانقربش سوحات الخراب
ولا لنذال رفقتهم النا
كل البُعد داروله جراب
وجرابى بُعد من دانى دنا
نعلى دوم كعلو السحاب
اللى بامطار خلاها نماء
ازيان العود ومعاها العشاب
كسا البرور غطاها غطاء
ولا نبداش كى لون الجداب
محى المنبوت ما كنا زها
كالقرآن نازل للعراب
جاب امثال ما ليها حصاء
ناخذ جزء للعاقل صواب
كلمة واختها لنا شفاء
شجرة مثمرة تنتج اطياب
والاخرى خبث جثت من وطا
الزين ايزين مطرى فى الكتاب
اصل وفرع للذاهب اهداء
يا صاحب ليش تطرح فى اسباب
وانا مليان من بُغض الانياء
تحاذى ناس تحسبهم احباب
مع الايام تلقاهم اعداء
اجبرت او حرت ما لياش باب
سدوا كل فجوة ملايما
امفتح عين فى زهرة شباب
بين اقوام تنهى عن الخطا
يا مولاى فراج الاكراب
من الاجواد لا تقطع رجاء
نركن فى خلاتى
او نركع فرض لعالم حياتى
اصول الخشم كانش فى صلاتى
نسجد بيه لرب العلاء
معدودات منه بيناتى
خمس اوقات ما عنهن بطا
اتفرج والخواطر ضائقاتى
او تبعد بعد فجوات البلاء
افعال الخير ديما لازماتى
المؤمن كان ماعنهن عصا
افكارى دوم يشكن حايراتى
بين الناس والله فى خلوتا
من فعل امور ماهن لازماتى
او لافيهنش ذرة ملحياء
لو للعقل نلجى بالثباتى
وانقارن بين توا او مامضا
نلقى الفرق شبه المعجزاتى
كُنا وكان اوقدع ماورا
الله يجيرنا مالظالماتى
والسامعين واللى سامعا
ونذكر دوم سيد الكائناتى
صلاة او تسليم ع الهادى هدا