خط لفانا بالنثر والتماثيل

قمنا لتعظيمه قبل ما نفله

حي الكتاب وحي من ولف الجيل

واللي عنا به من بعيد يشله

يا من يساعدني على رد ما قيل

الشعر يبغي فارغ مغرم له

يا زيد قم سافر على سطحة الميل

وانص العراق وما سوى الدرب خله

ومن فرضة البصره على سكة الريل

مسرى وبغداد الفجر حروة له

وطيارة البسطه الى رمت تعجيل

العصر درب القاهره لا تزله

عند الاهرام وشف مزارع هل النيل

والصبح طيارك مسيره يدله

دار الفرنسي عن يمينك مشاميل

واسبانيا غربيها فوح دله

وتشوف لندن كنها ظلمة الليل

فيها المداخن والقصور المطله

والشعب فيها جاد للمحاصيل

وفيها الموظف ما تجي منه خله

لا تخلفك شاشاتها والدهاويل

انصى مضيف محمد في محله

ابشر الى جيته بسمت وتبجيل

في مجلس لو طال بك ما تمله

سلم عليه وخبره بالتفاصيل

الله عسى درب السعد مركب له

عشرة اشهور بالسفر والتحاويل

وهاذي خواطرنا لشوفه مطله

طول التغرب يا سنادي غرابيل

والحر الى نكس ذكر ماكر له

جانا المصيف ومقبل طلعة اسهيل

وهاذي الغروس ابحملها مستهله

والجيش ربع في حماها مواحيل

حمر لقناص الخلا منوة له

ما ازين مواطاهن الى نشف السيل

بأرض القفر والكل يتبع هوا له

من فوقهن خطلان الايدي مشاكيل

كل أبلج كسب الثنا ملبس له

ومعنا حرار الشام للصيد ترسيل

كل أشقر يعجبك ورده وعله

للطايره ينحن مثل المحاحيل

وان وقعت في الارض هي منوة له

الى شرف القرناس عقب المنازيل

والحوش شافه يدرج في محله

تغازوا الجمنه على الضمر الحيل

والكل رد لسبق طيره يفله

وقت الهدد لابد تجري كشاكيل

هاذاك يستربع وذا صايح له

والكيف طاب ونكسوا للمقاييل

والكل يظهر صيد طيره يفله

والى نوخوا نشرب من البن والهيل

صناعها فطن لفوحه وزله

في وسط روض مزهر له تشاكيل

الله عسى دهم السحايب تعله

هاذيك نزهتنا الى من اهو قيل

كل يبي عقب التعب راحة له

واسلم عساك اتجي ابخير وتسهيل

وتحوز ما تبغي من الخير كله