يا ألد اصحاب قلبي يالحبيب

كيف تطعني وتسئل وش وبلاي

يعني مو سامع ورى صوتي نحيب

ما تثاقلت الحروف اللي بـ شفاي

انمسخ صوتي وزاغ الجرح شيب

لكن ورب الاماكن يافضاي

لو على هـ الديم شرهه ما تخيب

هقوت ارضي فيك ياغيمة سماي

كم زرعت بوجهك اغصان الزبيب

وكم يبس حلقي على ينبوع ماي

قوم غمض عينك الخجلا وغيب

ودي اعرّي ضلوعي من عناي

ملت اعماقي تفل الغدر طيب

ومل يشموم المحاني من وفاي

لا تثاوب وانت يالجرح العطيب

منعس بصدري على وسادة شقاي

ماشربت المر يالغصن الرطيب

كود من حنظل سرابك ياضماي

ويش اسوي لا فضحت شمس المغيب

صدري اللي ما ستر ضلعه خفاي

اندثر صوتي على اسوار القنيب

ورحت انادي للشوارع يامداي

ضقت فيني ليه يالكون الرحيب

وين ابرحل وآخر حدودي عناي

خلني بروح ولاّ يالحبيب

بفهق ضلوعي وناظر وش وراي

مو بلاي اللي على وجهي غريب

الوجيه اهي الغريبا وذا بلاي