بس يكفي !
وارفعي فنجانك الله لا يديمه
ايه انا قاطع طريق ونذل مشهور وحرامي
ايه بياع الكلام السمج ، وانتي يا غشيمة
لو بغيت ، استغفلك هالحين وابيعك كلامي
وسط قلبي شجرة للحب ملعونة واثيمة
لو رميت الظن تساقط عناقيد الأسامي
وش تبين أكثر ؟ تبين افتح ملفاتي القديمة
واستثير الحقد والغيرة واراضيك الظوامي ؟
والله اني مدركٍ هالحب في ثوب الشتيمة
واقدر استشعر دفا انفاسك تبعثر في مسامي
بس انا ماني من ادنى السوق يا مال الغنيمة
وانتي اخر شخص ينجح يوم ويثير اهتمامي
جاهلة ، وستايلك مقرف واساليبك عقيمة
والله اعلم داخلك شخص معقد وانتقامي
صح أنا مفتون بالأنثى ، وحالة مستديمة
وكنت اغازل طفلة الجيران في حفلة فطامي
بس عمري ما استغل الحب لاهداف لئيمة
العب اوراقي على المكشوف لين اوصل مرامي
لو انا لي نيةٍ ماهي على الفطرة سليمة
انكر عيوبي على شان ابهرك واجيك حامي
ايه انا مجرم ، لكن في عرفي أن أقذر جريمة
إني أرفع راية استسلام لين اطلق سهامي
وبس يكفي ، هالعتب ما ينقصه غير الحشيمة
وانتي انسب شخص يستاهل ، مع كل احترامي