اليوم موضوعنه مكرور
ذكروه جم شاعر مشهور
قصة انمثلها كل يوم
أو ماشية من أقدم العصور
بيت أحمد شوقي الشاعر
في قلب كل واحد محفور
قالالله يرحم روحه
يا طالب لاتكون مغرور
لين دش الصف أستاذك
قوم واقف عني مشكور
بس الطلاب هاليومين
تركوا هالقول المذكور
ايون الصف متضايقين
جنهم داشين في قرقور
يالسين و افكارهم ضايعة
ما أدري في أي سكة تدور
ولين اسقطوا لامو الاستاد
طالبنه مسكين مغدور
طلابي اصغار واكبار
مخلوطين من كل أعمار
فيهم طيبين مجتهدين
في ساعه يحفظون الأشعار
وفيهم الله لايواريك
مايعرفون ياكلون اكنار
كلٍ يبي يصير دكتور
وأمخوخ اكثرهم كَشبار
ادرس يابني ساعه
مايصير طول يومك دوار
والدك يعرق طول شهره
حتى يدبر جم دينار
أنصحهم و أعصر قلبي
وأطلع احسن الأفكار
ولو كنت أنفخ في قلب
من ثلج جان تحول نار
أولادنه اليوم ما يدرسون
ماخذين التعليم فشار
ويبون باجر يتخرجون
ويصيرون اغنى التجار
نط لي يوم طالب خنفوس
يسأل إش فايدة الدروس!
ناس في السكة مستانسين
والطالب في الصف محبوس
ليش ما تعلمنا في الحب
اشلون نغازل ونبوس
قلتله روح عند المحسن
خل يحلق راسك بالموس
طول اليوم واقف وأشرح
وأقول : حفظوا يا أولاد
شلون من غير ما تدرس
تبي تصير ريال كداد
الله يساعد المعلم
في بلادنه وفي كل البلاد
كل الناس تتعب واتلوم
و لمعلم والله مظلوم
كل اسبوع الفين صفحة
من غير الِتعلوم
وطول يومه واقف يشرح
لين ينشف منه البلعوم
لاتتكلم يا يوسفوه
لاتتحرك يا جسوم
ليش موب حافظ يا حظي
اسكت اشوي يا سلوم
وينط لك واحد راكَد
في اخر الحجره ويقوم
أستاد لو تسمح اتعيد
الدرس هذي موب مفهوم
ولو المسالة بس وصلت لين هني
جان نصبر ونقول: مقسوم
حاسدينه على جم دينار
يبونه ندرس ونصوم
يا ناس رحمونه يا ناس
مظلوم لمعلم مظلوم