هب الهبوب الي يفر الدواليب

يدفع هواجيس الضمير ويمرّه

مافيه دولابٍ بروس اللواليب

يمر به في خاطري الاّ يفرّه

واحيا من اموات الطواري تعاجيب

تعرض على راس الغشيم وتغرّه

بين اليقين وبينها شوكة الريب

لو تنكسر طافت حدود المجرّه

تشفي كبود مكثّرين المطاليب

اللي بها من جور الايام حرّه

شفها تناقلها جموع المناديب

هفّت حزايم خير ربي وشرّه

الشايب الّي قد كسى راسه الشيب

مافيك له يا ناقل اسمه مبرّه

طلاّب طيبٍ ما بدى منّه الطيب

ينقل عطا غيره بكيسٍ يصرّه

يمنعك حقٍ قدّرته المواجيب

لا نشتحن في كر حربك وفرّه

يسير عقبك دامحين العذاريب

يمحون لك من درب الاوثان جرّه

في شرعنا ما ياكل ذراعه الذيب

لو حل به من جوع بطنه مضرّه

وفي شرعنا حّرٍ بليا مخاليب

يصير في دكن الوطا مستقرّه

قصّاب ما يربح وراك القصاصيب

كريم هرج وما لضيفك مسرّه

يللّي تودّي بيض الاوراق وتجيب

ياما حلا اسمك مير عشرتك مرّه