إفراج يـ اغلى متّهم عندي افراج

فكّ القيود اللي سوات البناجر

لسجوننا مدخل و تسعين مخراج

لا عزلةٍ فيها و لا هي محاجر

غادر ترى ما في الخروج ايّة احراج

و لا على البيبان ناهي و زاجر

لا ضير لو ماتت زهورٍ بالامراج

و لا مشكله يخسر بالاسواق تاجر

خطوة مسير , أو رحلة اسرى و معراج

نفس الختام لمن خطى و المهاجر

و دمعه لها من فوق خدّك تدحراج

ما تختلف عن دمعتك في المحاجر

يعني يكون اجحاف اذا كل هرّاج

يسكت مع اوّل غصّةٍ بالحناجر

جاك الخبر لكن بتشبيه و اخراج

لا ينكشف و يصير سلعة متاجر

ركّز و طيّح ظلمة القاف بسراج

و حاسب يغرّك فيه نحت المناجر

و اليا كشفت اوراقه الّي بالادراج

اصبر عسا ربّي لصبرك يآجر

فارق كما تفرق عن القاع ميراج

علّ المدى يبري طعون الخناجر

و احذر يأخرك الأمل تبني ابراج

الشرع ما يقبل صلاةٍ لفاجر