ـ1ـ
الْغُربِه دْمُوعْ، وْوَطَني بْعِيدْ
يا عَلي.. صَوِّرْلي رْجُوعي
ما شَافِتْ أيّامي الْعيدْ
وْلا نِشْفِتْ بِاللّيْلِ دْمُوعي
ـ2ـ
لا الْماضي بْعِدُّو مْنِ الْماضي
وْلا الْحاضِرْ قِادِرْ يِشْفيني
عشْت الْغُرْبِه وْمَنِّي رَاضي
قللّي شِي كلْمِه تْراضيني
ـ3ـ
".. الْوَطَنْ مَطْرَحْ ما بْتِرْتاحْ.."
يا عَلي.. شو عَم بِتْقُولْ؟
كْلامَكْ مَنْبَعْ لِلأَفْراحْ
رَحْ بيغَيِّرْ فينا عْقُولْ
ـ4ـ
".. الْوَطَنْ مَطْرَحْ ما بِتْكُونْ.."
يا عَلي.. زِيدْ التّفسيرْ
".. الأَرْض الْما بِتْحِدَّا عْيُونْ
كِلاَّ وْكُبْرَا بَيْت زْغِيرْ
ـ5ـ
وِالْغُرْبِه؟! ".. بُعْدَكْ عَنْ أَللّه
عَنْ خَيّ نْكَرْتِلُّو وْجُودُو
الْمُؤْمِنْ، لَوْ بِالْغُرْبِه صَلَّى
بْيِرْسُمْ بِالْجَنَّاتْ حْدُودو
ـ6ـ
يِعْني بْعِيشَا؟؟! ".. عِيشِةْ تَقْوَى
أَللّه ما بْيِتْرُكْ إِنْسَانْ
بْلادَكْ، مِنْ دُونُو، شُو بْتِسْوَى؟
إيمانَكْ هُوِّي الأَوْطانْ
ـ7ـ
وِتْرابي؟!! ".. مَرْهُون تْرابَكْ
مِنْ يَوْمِ اللّي كنْت وْكانُوا
وْكلّ الْـ جَمَّعْتُو بِحْسابَكْ
عاجِزْ حَتّى يْفُكّ رْهانُو
ـ8ـ
يا عَلي.. يا مْرَيَّحْ بالي
بِالْكِلْمات الْـ فيها تْجَلَّى
أَللّه، تا تْوَسِّعْلِي مْجَالي
وْإِسْتَوْطِنْ هَـ الدِّنْيي كِلاَّ