ذابت عيوني في ابتهالي و طريتك

و اضنيت ذاكرة الدُعاء و تمنّيت

في حضرة الجرح الأناني بكيتك

عجنت دمعاتي و فيها تحنّيت

حنّاي أبنقش به سنينٍ عطيتك

أرهقتها نزفٍ و اخيراً تجنّيت

عدّيت محصول التفاني و جنيتك

جرحٍ على جرحٍ ثبت يوم ثنّيت

جرّيت آهات العنا و اشتكيتك

و دوزنت أوتار الشقا ثم تغنّيت

غنّيت .. ليتك يا منى الروح ليتك

ليتك على جرحي صبرت و تأنّيت

حنّيت لك ساعة ( يِتْم ) و احتريتك

تقرالي تهويدة حنوّك و ضنّيت

عنّيت لك صوتٍ ينادي : فديتك

ما هو مقاسي بُعدك ْو لا تهنّيت

يا شين وينك ؟ شوفني ما سليتك

أذْكرْك و كلْما تلّني الشوق ونّيت

ذلّيت بك عزّ العباير و جيتك

من باب تذكار الغلا و اطمأنّيت

أمشي و في كفّ الميانه خفيتك

ينبيك ( مفتاح الفرج ) كم تعنّيت

وطاحت نجومي من غلاك و ضويتك

و المشكله .. يومك بنورك تدنّيت

ليتي تحرفنت الغياب و عصيتك

ليته فؤادي ما عصاني و حنّيت