تنفسك مثل البحر يغزل سواليفه
وأطرافه بممشاي
أتنفسك
والنهر من دمعي يبس
وتناثر بأرجاي
جفت سواقيه وترامى واستباح بكاي
والليل عوّدني الظما
شفني على طيفه سهر
أتعب وألم خطاي
همي مثل عتمة ضيا
مثل الألم
مثل الشقا
مثل الشتا
مثل الضياع اللي لبس وقت الحزن بلواي
أتنفسك
وأضم صوتي في دموعي
وألتمس شكواي
يا ضحكة العمر المسافر
المدامع ناي
يا ذا الجمر
يا ذا العطر
ياذا الوجع
ياذا الولع
يا الرايح اللا جاي
شفني غمامة شوق
من طرف الحكايا
تبتسم لك ثوب ٍ مزرّاي
عذبه مثل همس الفرح
يمكن شرات الماي
وأتنفسك
قل لي أنا
هذا الجفا إلى متى
يا كل حناياياي
إلى متى وأنا المّح للشجر
يا ذا الشجر
ولّم عذوقك واحتفل
واشرب تمر
رجواي
لا تلوّح يا عطش
يكفي سجن رمضاي
واحذر
تصحّيني ألم
خل الحزن جواي
وخل الحمام اللي شهق
يغزل غناويه
أحجيه
في منتهى نجواي
يمكن تصدق ذات مره
إنني لجلك جمعت
أنفاس
وأطراف الليالي
والشعر وأرجاي
وإني على صوت الأمل
لملمت شال الليل
وأغريت نجم الصبح
يزهر لي ب حنّاي
وإني على رجع الصدى
فكّكت حبري بالسهر
وتنافرت ظلماي
وإني على وقع الضيا
وصّيت قلبي لك يطير
ولك يصير
إحساس نادر
ما تعب
يوقف على رمش الغصن
ويغرّد لمنفاي
يسعد قلوب ٍ عاشقه
ويهيم في صحراي
ويفرّح قلوب البشر كل البشر
ويلمّهم
إلاّي
اتنفسك
وأوعد جروحي بالدوا
وأصبّر المنساي
يمكن على حين انتظاري
ألتفت
وألمَحك حلمٍ جاي
وأتنفسك
همي وعطري
وانتظاري
وانكسار أجواي
أتنفسك