ياللي على البال تطري وانت ماتدري

وش ذنبه اللي يحبك وانت خليته

وش ذنب قلبٍ رسم لك حبه العذري

وش ذنب دمعٍ على طاريك هليته

لو كان عمري بيديني فدوتك عمري

لكن عمري بيدين اللي ترجيته

انه يرد الزمان اللي على خبري

واعيش ليلك وحلمٍ كم تمنيته

يوم ان قلبك بصدري وانت في صدري

ضيفٍ سكن بالحشا واثر الحشا بيته

الايام تجري وعمري بالشقا يجري

حتى الشقا منك رافقته وحبيته

اصبر على حالتي ويملني صبري

واعيش في لوعتي واقول يا ليته

والليل في ناظري يا صاحبي يسري

والشعر لجل الهوى جبته وغنيته

واذا تكلم عذولي قلت له عذري

ان الهوى يذبح العاشق وانا جيته

والا انت ماتدري انك كل ماتطري

يصيح لك بالحنايا شي خليته