صباح الحب / صباح الورد / صباح أحلا من السكّر

صباح هاديٍ غرّد به العصفور بألحانه

صباح التوت والكادي صباح المبسم الأحمر

صباح الضحكه الحلوه ونظره منك خجلانه

صباح الخوخ لاعانق عناقيد الكرز وأثمر

صباح النفل .. لاخالط عبيره .. ريح ريحانه

صباح (اللتغه) بلسانك صباح الناظر الأحور

صباح (التمتمه) بشفاك أموّلهاعلى دااانه

صباح الهيل والدلّه صباح الروض لا خضّر

صباح الفلسفه والطيش ومشيه منك طربانه

صباح الصبح بخدودك وشعرٍ ساكبٍ أشقر

صباحٍ تاه بورودك وصمتٍ فاض بركانه

صباح الطالب الشاطر يردّد ( ياعلم أخضر )

صحى نومه بدا يومه يروم المجد لأوطانه

صباح الشعر والشاعر حروفه فيك تتبختر

مدام إسمك يغذّيها أكيد تكون رويااانه

هلا بك كثر ماجيتي ورحتي لا بعد أكثر

هلا بك كثر ما يبكي الحزين بدفتر أحزانه

هلا بك ليش أكررها وهي في طلتك تصغر

يحير القاف بيديني وتسافر كل أشجانه

أشوف الورد بحضورك تنفّس وإنتعش وأزهر

أشوف البيت بقدومك تغنّت كل جدرانه

ثلاث شهور وعيوني تسامر طيفك وتسهر

ثلاث شهور وجفوني يسيل الدمع بأوجانه

أنا أدري الدرب يطويني وأنا أدري موتي مقدّر

وأنا أدري أن الهوا سجنٍ غدا قفله وسجّانه

تعالي لعنبو حيّك زمان الذل ما قصّر

صفى للخاين الكاذب / صفى للغش وأعوانه

تعالي لملمي شتاتي جبرني الوقت أتبعثر

تعالي وأسعفي بطيبك غريقٍ تاه ربانه

دخيلك لا تخليني بعد هاليوم أتحسّر

دخيلك دفّي أحضان بغيابك حييييل بردانه

أميرة حب وإخلاص وعلى وصفك أبد مقدر

وتبطي ماوفت حقك بحور الشعر وأوزانه

وإذا جيت أوصفك مالي ياكود الفل والعنبر

وكل الغيد من حولك ورودٍ !! بس ذبلانه

يابنت العز ماقلت القصيد وغايتي أظهر ؟؟

ولكن أكتب أبياتٍ يكون (الصدق) عنوانه