تدري وش أكبر ذنب في الشرع و الدين؟!..

إنك تسب اللي خلقك و تذمه

و تدري وش أكبر عيب عند الميامين؟!..

انك تخاوي لك من الناس رمه

و تدري وش أخطار التجاوز من يمين؟!..

إنه يكون اللي على الباب عمه

والمشكله لا سلهمت فيك بالعين

والريح تنثر في شعرها وتلمه

يضيع فكرك بين حد الحجاجين

و يمكن تجيب الكارثه و المطمه

و تدري وش اللي يدبل الكبد ويشين؟!..

بعض القصيد اللي على غير يمه

يا بندر ابن سرور وين أنت هالحين ؟

وين أنت يا زبن الأمور المهمه

وين القصيد اللي يدك الميادين ؟!.

و يهز شيخ فوق رأسه معمه

الشعر والشعار صاروا عناوين

و مهبل تشري القصيد وتصمه

صاروا مثل ما قال لعبة وراعين

وكل(ن)تربع له على رأس قمه

يقول أنا الشاعر و غيري مجانين

ودك على مجمع حنوكه تخمه

الناس تذبح في العراق و فلسطين

و قصايده يا حلو عينه وفمه

عساه يؤخذ في الضحى قولوا (آمين)

اللي بنات الناس شغله و همه

أحد يحاول ستر عذراء البعيدين

و أحد يدور بالردىء بنت عمه

قد قالها بندر قبل عدة سنين

يثور معها الحر و يثور دمه

ولا الردي لو مرته بين قوسين

تزول عن عينه مزول المغمه

يا بنت شومي عن أهل الضعف تكفين

مالك ومال اللي قريب مجمه

والشاعر اللي من رجالٍ مسمين

عليك فرض لازم إنك تتمه

الدار .. والعادات .. والسلم..والدين

ثم عقبها وجه على أياة يمه