حاجات صُغيّره
أو ضد هوايا وألوانى
ضد هوايا
ها اختار بنفسى
بإيدى دى
الورده اللى تناسب روحها
وتليق مع كرانيش فستانها
عارف
عشقها للشمس
وللألوان السُخنه
عشان كدا هااختار لها قبرها
ضد هوايا وألوانى .
حريه
بس
بنام على حس الحواديت ...
اللى واكلها الدود والعته
بس
مطبوع على روحنا صفار الورق المهزوم
بس
ها افضل هنا
فى العشه دى
اللى احتفلت فيها لوحدى
بحرية جسمى وسط أزايز البيره
وبس.
أصول الخديعه
المدينه اللى اتبسمت ليِّا
مع إنى الواد اللى كفوفه
ما مسكتش الشوكه
ولاّعرفت رجله الفِوَطْ الأفرنجى
المدينه اللى ضحكت بعنف
على روحى اللى ماتت
على أول باب عرِّت لى بزازها قدامه
وفهمتنى أصول الخديعه
ومعنى الابتسام
جنب الهيلتون
حا تبتسم قوى
لعلب الورنيش
اللى بتترقص جنبها الجزم
ولأزايز الزيت الفاضيه
اللى نايمه على وش السله الحديد
وحاتبتسم قوى
على روحك
اللى فى مره شوفتها
بتزك فى الخرابه اللى جنب الهيلتون
مع إنى عربجى
عربجى
أيوه
فى إيديه السرج
وتحت منه شوال
وبيعرف فرسه لمَّا بتحرن
حا افضل كدا
على عربيتى الكارو
سارح فى العفونه
وِفشْل الحمير
لدرجه خلتنى
أعرف الحمار الطيب
من البنى آدم الطيب .