أحلام كل السوالف صارت أحلام

وحتى الاماني غدت ماهي أماني

روحي وعقلي وقلبي دونك صيام

وكل المشاعر من غيابك تعاني

تنام حولي جميع الخلق ما انام

ساهر مع الليل وسهيل اليماني

ذكرت ذاك الزمن وأشواقي حيام

والحزن فاق القصايد والاغاني

الله يرحم ويذكر ذيك الايام

بالخير لو كان ما يرجع زماني

محبوبتي في غيابك دمع الايتام

شق السما ديم من خافي كياني

نكست في غيبتك جميع الاعلام

وأعلنت موت المشاعر بالمحاني

حزن وهموم وشقا وافكاري اقسام

وساعات تحتار رجلي في مكاني

قلبي وأعرفه ألامن طاح ما قام

ياما رجيته يوقّف لو ثواني

والفرح تحفي دروبه مشي الاقدام

ليته على الدرب وقّف وأحتراني

الواقع بيوم حطّم صرح الاعوام

صحيح الاقدار ما تقبل ضماني

والصبر كذبه تخفف حجم الالام

يا طول عمره وانا مخلوق فاني

عقبك جميع المشاعر صارت أصنام

ماتت قهر والرجا عل وعساني

جرحت خد الورق بدموع الاقلام

بكيت شعري وشعري كم بكاني

أحلام أسمك وحبك مثلك أحلام

فرقاك أخر محطات الاماني