تجيبك الضيقة من العام ل( اليوم )

ماهو بيدي ، عيّا الفرح لا يجيبك

تبيع ف( اشواقي ) من العام وتسوم

واسامحك ، واكبّرك ، واحتفي بك

عدّى علي الوقت ضايق ومهموم

حزنٍ يصوّبني وفرحٍ يصيبك

ألومني ، واقطع عن عيوني النوم

لأجل اسعدك ، حتى لو إنّي عطيبك

عن الشكاوي والعتب منك مفطوم

ليه اشتكي؟ وآنا نصيبي نصيبك

لو انني محروم ما قلت محروم

يكفي على قولك : بأني حبيبك

كنت اقتنع ، ما كنت ادوّر عن اللوم

كان العطا عيبي ، والانكار عيبك

ما كنت احسب انك على الصد ب( تدوم )

يا قربك ل( قلبي ) لو إني غريبك

واليوم علمٍ بان ، واندفنت علوم

انت اسعد العشّاق ، وآنا كئيبك

عشت وكثر خيرك من العام ل( اليوم )

والسكّة اللي ودّتك لا تجيبك