لاتسافر والمسا برد والغربه عذاب

وانت لاسافرت تأخذ معاك اللي تبيه

انت تأخذ كل شيٍ تحب بلا حساب

غير ذكرى صاحبك/غير دمعة ناظريه

تأخذ الكون الفسيح/السما/نزف السحاب

تأخذ الروض الخضر والأسامي والوجيه

تأخذ انفاسي معك والأماكن والرحاب

وزرقة البحر وبعض همهمات الموج فيه

انت تاخذ ما تبي غيري وجلّ المصاب

ليتك اخترت احِدنا في غيابٍ تشتهيه

لين يمدي صاحبك يرتوي بهذا السراب

وان تولاّه العطش بالوهم يملأ يديه

كيف يتلاشى حبيبك الى حد اليباب؟

وانت تلقى صورته كامنه في كل تيه

غبت واجد بس غيبتك هالمره ذهاب

شفني اركض خلف ركبك ولا الحق عليه

انت غب في غربتك لين يغريك الإياب

وخلني في غربتي لين القى لك شبيه

خايفٍ تنسى السنين الطويلات العِذاب

وانكسارات الهوى وحلم كنا نقتنيه

وضحكة اطفالٍ تنامت الى حب وعتاب

كل مايركض بي الهم تركض تتليه

جاني الحينه خبر: سافر لكل الغياب

والحبر ما جف والشعر يتأسف عليه