الله عليكِ يا مصر
و الكل بيحبك
و الكل يا أمنا
شايلاه هنا فـ قلبك
و الكل مهما بعد أو حتى يتغرب
لازم يجيلو اليوم
يقعد هنا جنبك
***
في ظل شجرة توت
أو حضن جميزه
كان المزاج مبسوط
من طنطا للجيزه
نقعد كدا شله
نحكي نوادرنا
و تسيل دموع العين
مـ الفرحه و اللمه
نفتح قلوبنا لمين
غير ليكي يا طاهره
تاخدينا بالأحضان
و ننام كدا فـ حضنك
***
يا مصر عمرك يوم
ما كنتي يوم قاسية
اصلك رضعتي النيل
و على الضفاف راسيه
نخله و هرم و بيوت
يتحدوا نصل الموت
أما العدو الغدار
ينهار أمام شعبك
***
يا غاليه يا طاهره
عايشين بأنفاسك
عايشين هناك بره
حاسّين بإحساسك
و نقول بعلو الصوت
و الفخر مصريين
كاسبين جمال الروح
و الخفه من طبعك
و اللي شرب مـ النيل
لازم هيرجعلك
