على ايه كدا مغرور
و الكِبر من طبعكْ
دايماً تِلِفّ تدور
تختال ما بين ربعك
و انتا يا دوب فرفور
بتزن ، مش سمعك
طنطن و عيش فـ الدور
ايه اللي كان مانعك
***
طاووس و لونه جميل
و بيخدع الأنظار
منفوش و حجمه ضئيل
استرها يا ستار
بيردد المواويل
و العود ما لوش أوتار
و الشدو مش تهبيل
لو حتى بيطاوعكْ
***
طاووس و كل طاووس
معزول هناك وحده
الريش كساه ملبوس
مش جيّ على قده
خلاه كما المهووس
كل الطيور ضده
بتقول عليك مدسوس
إوعك تكون ! إوعكْ
***
صعبان عليا كتير
يا حلو يا زغيّر
لو كنت نسر يطير
كان الغرور يكبر
لكن يا دوب سنفور
في الشكل و المنظر
بتخاف تعيش في النور
أحسن يسيل دمعك