ابتدا التفكير والهم والهاجس رقص

رقصتن يغري بها الفكر في وسط الذهول

حابسن نفسي عن الناس كني في قفص

دارت الايام فيني ودارت بي الفصول

كل ماقلت ان حزني غدا والا نقص

اكتشفت انه تزايد ولا عندي حلول

عزتي لي راح عمري وهمي ما خلص

كل ماقلت انتهينا واثر عاده يطول

ياحسافه دام قدري مع الغالي رخص

اثر له في بيع ذا الناس غايات وميول

واثرني من جيز ذا الخلق والحب اختبص

وضعنا واحد بعينه واخذنا بالشمول

ماعرف قدري وطبعي وفيني ما بخص

والخطا منه وخله يقول اللي يقول

الرجال بفعلها وكل شارب له مقص

والجمال جمال وتشيل من ثقل الحمول

ماندمت الا على الوقت والدنيا فرص

لاني برجلي ولا نيب في ظهر الذ لول

والقدر مكتوب للعبد لو انه حرص

لو يفر يسار ويمين مايقدر يحول

والفطين اللي لساعات وقته اقتنص

لا يضيع كل وقته على عشقن يزول

عقب مادلوي من ايدي تهاوى وانملص

والله ان ابطي وقلبي من الخاين جفول

والبنادم دامه اصلا تأذى وانقرص

لا يكرر غلطته لا ولا يصبح عجول

سيرة العشاق صارت روايات وقصص

يوم كان الحب غارات ورماح وخيول

والمحبه صارت اليوم بدروس وحصص

كثر ماتدفع تزيد المحبه والقبول

ولو زهمت الحظ يبطي وعاده ماقحص

لين تذبل كل ورده ربت وسط السهول