مادريت ان الهوا لعبته لعبة كبار

لين شفتك راجع لي عقب ذاك البطا

جيتني من عقب ماصار بالشوق انحدار

وفي عيونك دمعة تعترف لي بالخطا

جيت متأخر وانا عقبك اسدلت الستار

مابقا فيني محبه ولا عندي عطا

انتحيت من الموده وغيرت المسار

صرت الوم النفس وشلون حبك بي سطا

انت لو كنت اتعرف ويش معنى الانتظار؟

كان دوّت صرخة طيّرت سرب القطا

إصدمتني كذبة جات في عز النهار

لين وقفت القدم في مكانه ما خطا

ليه تكذب بالمشاعر وتلعب بالقرار؟

وانت خابرني من سنين لك ستر وغطا

ليه حديت القلم يكتب بيوت قصار؟

وانت تدري فارس الشعر للخيل امتطا

هاك مني كلمة تنفعك يالمستشار

من عزيز عز نفسه من اول ما شطا

من حشم نفسه عن العيب يبشر بالوقار

ومن مشا درب الرذيله يعوّد للوطا