من زمان مودّع العشق وايام الغرام

من زمان اعيش لحظات عمري مهتني

من زمان معانق الغيم واطراف الغمام

عقب ماروحي شكت لي تقول اوجعتني

ليه رديتي علي ؟؟ ليه خالفتي النظام ؟

كيف دليتي طريقي وجيتي مسّكني ؟

ماتركتيني مع الطيف لاجا بالمنام

دامني في حالي ادرى وفيها معتني

أدري انك كتلة احساس واشواق وهيام

كافي اني من جمالك اقول اذهلتني

وادري انك بنت شيخ ومن ربع إحشام

ياقوام يبهر العين كم عذبتني ؟

وادري انك في دجى الليل بدّدتي الظلام

لين جاك البدر يشكي وقال احرجتني

وادري ان عينك بها الموت ورموشك سهام

وادري اني لا نظرتك اقول ابهرتني

ورغم ذلك اتركيني وعيشي في سلام

مانفعني طيب قلبي وصافي معدني

من يشوفك غصب او طيب يوليك اهتمام

لكن اللي يعرفك عن غرامك ينثني

احترم اطراءك واحترم كل الكلام

بس قلبي ويش ذنبه مدامه مهتني