ياوجد روحي وياليلي وياهمي

من حاجةٍ طلّعت قلبي من اعماقي

حاولت امسّح دموعي في طرف كمي

وازريت انشّف طرف كمي من احداقي

عشان حوريةٍ من لحمي ودمي

ربي كتبها تعيش المهد بفراقي

يابعد جدي وابوي وخالي وعمي

يامن يعلمك يا(ريما) عن اشواقي

حرام بالله ماهو هرج من فمي

اخذت قلبي وحطّيته على اوراقي

مااحدٍ درى عن هواجيسي وعن غمي

وشكواي للواحد المعبود رزّاقي

صبح اتصبّر وترياقي ذبح سمّي

والليل همي غدى سمّي وترياقي

لكن ماهو على كيفي ولا كمي

ولاّ عطيت الهوى ساقي بعد ساقي

واقول ماشالله الرحمن واسمي

وتجين في حضن ابوك الدافي الواقي

لاكنّ بعض الهواجس ميّلت يمي

شبّت لواهيبها في داخل ارواقي

من بعد مالله حقق نصف حلم امي

اخاف ربي يحقق نصفه الباقي

واموت عطشان عن بيري وعن جمّي

لاكنّ يارب تبعد هقوة الهاقي

يالله في رحمتك والشمل يلتمّي

واشوف نور البنات وشمعة آفاقي

وان مت تغفر ذنوبي وإحتسب همي

بعد الهداية تمكّنها من اعماقي