لو حبّنا أصبح وهم ما للوهم عندي مجال

ودي أقول قبل الجفا دام الوفا خان الشعور

ماني أبد لعبة أحد هذا ترى أكبر محال

أستأذنك راح أهجرك والله توّاب وغفور

لاتشتكي بسك بكي ماعاد يشفع لك دلال

دامك كذا إبقى كذا والدنيا صدّقني تدور

قلبك قسى خان ونسى وشلون أهديه الوصال

لاتعتذر مالك عذر لاتطرق أبواب الغرور

حبك خطا واللي عطا ماينتظر منك سؤال

يومه عشق فعلا ً صدق شالك غلا بين السطور

خنته جهل ماهو سهل جرح الغدر عند الرجال

مايحتمل غدرك رجل هذا ترى طبع الذكور

أستسمحك راح أجرحك والذنب في مثلك حلال

ودي أقول مالك قبول بين الحنايا والصدور

ذوق الألم واللي ظلم أظلم بلا شك وجدال

إبكي ترى مهما جرى مايندمل جرح الزهور

دام الأمل جف وذبل ماعاد يجمعنا منال

يكفي عتب و قلّة أدب وتجريح في كل الأمور

جرحي نزف وقلبي عرف إن الوفا بعض الخيال

والحب غش والطيب هش والناس مليانه شرور

وجرح الهوى ماله دوا وتنهار جدامه جبال

مير الرجل يبقى رجل ويبقى على الشدّه صبور

ولو حبنا أصبح وهم ما للوهم عندي مجال

أستأذنك راح أهجرك دام الوفا خان الشعور