مسا الوقت الحزين وضحكة دموعي على الخدين

مسا هذا الفضا المخذول فيني ل آخر اعوامي

عقارب ساعتي تعبث معي وتمارس التخمين

وانا اصرخ في مدى صبري تعبت وطاحت اقلامي

سوالفنا تسولفنا وتاخذنا معاها لين

يضجّ بنا السكون وتلتحف هالسكه اقدامي

أبغرق في محيط من اليباس وضحكتك تكفين

أبيها تشعل انفاس الرضا وتلوّن ايامي

على شان اتسلل من سكوني واتعلّق بين

مجراتٍ تجردني من امالي من الامي

أبرسم لك على وجه السما لا قرّبت قلبين

وابرسم بينهن سهم اشتعاله ينكر الرامي

كثر ما قلت احبك صدق احبك طيّب وبعدين

أبنعس لو ثواني في هدبك وصحّي احلامي

باشوفك مثل ما ودك أشوفك لو بليّا عين

وباحبك مثل ما ودي أحبك وادفي عظامي

لو ان الجرح غلطة وقت / محبوبك بدون يدين

ولا يحضن سوى هذا الغياب المُجدب النامي

حبيبك يشعله هذا الضياع بقسوته ويلين

سرق نور القمر واطعم حنينه جرحه الدامي

وانا اغسل من ضيا هذا المدى ضيقي ذكرت اثنين

جنوني فيك وجنون الورق لا صرتي الهامي

ابكتب فيك لين القى حروفي والقلم سكين

وابقرا عنك عشقي واتوّجس خيفة اعوامي