صبحتها بالخير قالت مسى الخير

يوم أخزرتني قلت ياقسوة الرمح

قالت ترى الدنيا مسى ياملا الطير

مع بسمةٍ غصب المسى ينقلب صبح

(قلت أعذريني ) دام وجهك ترى غير

يسعد صباح الصبح ياصبحي السمح

منه استحى المشراق لايمم البير

وأليا رفعتي غطوتك ينضج القمح

لامن تهفهفتي تطير العصافير

ويطيب لامنك ضحكتي له الجرح

تتنفسين الارض تنبت نواوير

لو تهجرين الارض يكثر بها الطلح

(لداوود كانوا أل أوتو مزامير )

مثل الأبل فيها (المجاهيم والوضح)

وانتي (أتاك الله) على أقل تقدير

ملحٍ على سكر وسكر على ملح

ماهمني لامن كتبت الجماهير

ماهمني ذمٍ ولاهمني مدح

قالت (مادام أنه كذا ) مو مسى الخير

وشهو مساء الخير ( والعالم الصبح )