ياللي شريت الذود ماهي غريبه

مدام تملكلك رصيد وملايين

بس الغريبه والبلا والمصيبه

ماذقت من عندك حليب البعارين

الدلبحي قد قالها من عتيبه

يوم الاصايل يدبكن الميادين

ياعل ذودٍ مايجيني حليبه

تقفي على تاليه خيل الدياحين

البل لها في ماضي الوقت هيبه

يوم القبايل ماتعرف القوانين

كلٍ عليها ويعتزي في صحيبه

لا شافله ناسٍ عليها مغيرين

من دونها جرد السيوف العطيبه

والروس مجدوعه من ايسار ويميين

وانته ياراع الذود طيبتك طيبه

وافي ومن ربعٍ على الطيب وافين

ايات شيٍ لابغيته تجيبه

وتبقى البداوه من ورى عام اللفين

اخذتها بالمال ماهي غصيبه

مرخصت روحك دونها يحمر العين

مايبخص المجروح الا طبيبه

وحنا نعرفك منت راعي بعارين

واذا شريت الذود ماهي غريبه

تاجر وتملكلك رصيد وملايين