فوق بيض الطرس من فوق ازرق العرق أدرجي

والحبر ما كنه الاالليل لمنه سجا

طال صمتك يا حروف القاف ارجوكي اهرجي

علميني من هلك بامواجك ومنهو نجا

خابر الساحة بها جنونٍ تقل بحرٍ لجي

شارق وشاهق وغارق واللي بحرفي لجا

كلهم بالشعر واحد يكتبون اللي يجي

كيف ما جا يكتبونه ما دروا يا كيف جا

والمصيبة كل ما يظهر على الساحة عجي

يدعي انه راعي العرش المليك المرتجا

كيف لو يقدر احدهم يكتب على منهجي

منهجي اللي لا نهجته اذهل احروف الهجا

ايه انا شعري نسيجٍ من شجوني وابهجي

من نسجته للشجون اشجون وللبهجة ابهجا

والله اني لا طرقت القاف فز المنسجي

وكل من حاول يطاول قمته طاح انسجا

رغم هذا ما ادعيت الملك باسلوب اهمجي

ولا ادعيته في اسلوبٍ كل ابوه ابرستجا

وإن حصل يوم وطرالي ياحروفي اروجي

اسرجي خيل المشاعر واسلبي نجوم الدجا