يا مجير من جار الزمان وتولاه

سلامتك من كل عارض صواديف

سلام يا مضفي على شعبه ارداه

ذراً يذري عن سموم و عواصيف

يا منبع الحكمة ويا مصدر الجاه

سلامتك ياللي لكل العرب ريف

أبوك قدّم لك على العز يمناه

يمنى عديمٍ حر كامل تواصيف

ملك السياسه والوفا والمداراه

والهمه العليا وبذل المعاريف

المجد للحكام ما هوب مشهاه

كلٍ يبيه ونافرٍ منه ومعيف

ومسلم لك من على راس مبداه

مجدٍ مقامه فوق روس المهاييف

يا عاشقة التاريخ والمجد وأبناه

الله يجيرك يازبون المواجيف

يا مجد من تشرق فعوله بدنياه

وتنور بحكمه مظلمات الأطاريف

وطيب الملك من طيب راسه ومجناه

مانيب أصور شئ للناس ما شيف

نور الملوك اللي عدل في رعاياه

وفك الرقاب من الغرابيل والحيف

كل الظمايا وارداتٍ على ماه

ومصدراتٍ بالروي حموة الصيف

ينهل مناهل الوفا لا عدمناه

تنشر له البيضا بروس المشاريف

بحرٍ من الحكمه تلاطم نحاياه

يقلط على جمع المعادين ليخيف

يالله عسى سود المنايا تعداه

غلاه بقلوبٍ حوتها السراجيف