التواضع والسخا والطيب كله

والبشاشه توجت وجهٍ زهت له

وجه ابو محمد لياجيت ل محله

تندهش كيف المروءة صخرت له

كنها من بد جيله عشقةٍ له

ماتبي غيره وبالجود هنفت له

ليا تذكر كل خلٍ حلوف خله

خلها بدر الجعيثن وحلفت له

الصفات السامية دقه وجله

أيدت طيب الموارث وأكدت له

ورثه عودٍ عسى الجنه تظله

بالظلال الوارفه حين أكملت له

سيرة مبارك مخلدها سجله

والمواقف بأطيب الفعل شهدت له

مجلسه بين الملا كل يدله

كم من جموعٍ على صيته سعت له

صيت شهم ماغشت فعله ممله

ما تملل من عنا ناسٍ عنت له

خلف اللي لابدا ذكره وحله

حافظين صروح مجدٍ شيدت له

قلتها وأسمى المعاني مسفهله

بسيرة المنعور ولحونٍ شدت له

نالها بدر الجعيثن دون زله

بطيب نفسٍ للمكارم سندت له

والختام اهدي من الباقات فله

ورد ودٍ من مضامين طرت له

للحضور وكل من جاه ووصله

منتدى آل عرجاء وناسٍ صفقت له

بالأكف الطيبه وبخير طله

صفقت له وأخلصت له وهتفت له