ميزة تميزها عن البيض يا سعود

عجايبٍ ما تنوصف من عجبها

الأولة نباهةٍ مالها حدود

وأصلٍ يشرّف يوم يذكر نسبها

والثانية لطفٍ مثل نافح النود

تغضب أمم ولا تبين غضبها

والثالثة نظمٍ من الدر منضود

بقصايدٍ ما كل مبدع كتبها

أخيلها شمس ودياجير وورود

ولواعجٍ غيم الغوى ما حجبها

وقدٍ تصهّر من عنا الردف مضهود

يبرز تبخترها وروعة تعبها

تسحب إخطاها كن بأقدامها قيود

أو كن حاسوب الكواعب حسبها

وتفننت بتسلهم عيونها السود

ومن حان حتفه ترشقه في هدبها

ومن تبتسم له عاش بسهود ومهود

لو صادفته أصعب مصاعب صعبها

لعيونها ما يحسب النقص والزود

لو منصبه بأعلى مراتب رتبها

لو تأمره يحضر لها شهود وعدود

ويقسم قسم إنه ينفذ طلبها

لبّا لها بالحال لو صار يا سعود

راعي حلال لراعيٍ من عربها