وتعال خذ مني هداياك

وباقي الصور وأغلى المكاتيب

ماعاد تنفعني بلياك

وجودهن عندي تعذيب

يكفيني أتسلى بذكراك

دامك نويت تصد وتغيب

أوعدك طول العمر ما أنساك

حتى ولو حطمني الشيب

ماينكر طيبك وحسناك

وأنا أجازي الطيب بالطيب

لولاك ماحبيت لولاك

ولاعشت في دنيا المحابيب

شفت الهوى والطيب وياك

باحساس وأقوال وأساليب

الله يسامح لك نواياك

ويحفظك عن كل العذاريب

أوادعك وأتأمل رضاك

ماحد حبيبي يعلم الغيب

وإن مت اذكرني بدعواك

وشوف الصور واقرا المكاتيب