شح القمر ما عاد يطلع وينشاف

الليل عاتم والصحاري محافيف

تبرق بروق رعدها سيل هتّاف

في وحشة فيها المخاطر مصاديف

الدار ماهي دار عزٍ ومضياف

دار خلت ما حوطوها مواليف

وأنا بذاك الليل ساري وخطّاف

البرد هالك والعواصف مناسيف

وديان تجري سيلها فيه رجّاف

أسمع صدى وطيور تشدي مخاويف

إن لاح بارق بانت أصناف وأصناف

ذيك الوحوش اللي تسنّ المراديف

أمشي ورب الكون حافظ ومسعاف

والليل في مجراه طاف المناصيف

الدرب خذني صدفة فوق مشراف

وأنظر بعيد وشفت نورٍ شرا الطيف

حتى وصلت اللي عليه الزمن طاف

بيتٍ وفيه الناس قاموا مواقيف

قالوا صديق ؟ قلت تايه ومولاف

تكفون جيت لدياركم يا عرب ضيف

تكفون دلوني على درب الأولاف

ما جيت شايل بندقية ولا سيف

أنا الجريح وجرحي اليوم نزّاف

واللي جرحني في الهوى سهم حريف