ليا صديقي لي تقول أنك صديقي

وين عني يوم أنا بحزات ضيقي

جيتني هاليوم تسأل عن مصابي

يا عسى عشرة مع أمثالك حريقي

وش يهمك عاد كل اللي جرالي

ربي المعبود سهلّي طريقي

للأسف كنت أحسبك دايم يميني

وافتخر وأقول يا نعم الصديقي

ما عرفتك بس من يومٍ وليلة

ولا عرفتك بس من جملة فريقي

م الصغر كنَّا نعيش بظل واحد

نرسم الآمال بالود الحقيقي

ما طلبتك شي في يوم ورجيتك

وإن طلبتك أحسبك دايم رفيقي

بيَّنت الأيام لي معدن صفاتك

وبينت لي دمعة الوقت الشفيقي

لو بودي شفتها من حد غيرك

بس لي طبعي وأنا ساسي وثيقي

يا صديقي الأولي روَّح زمانك

الصديق يكون في الشدة صديقي