خلوج الهبيدا جروعت في حنينها

تزفر بعبرات تبيّح كنينها

تجر عالي الصوت من مالجابها

وهي في مراح احوارها عاقلينها

تهوي على مبرك ولدها وتنثني

ولاحدٍ بلايمها بفرقا جنينها

ولّيّ خلوج كدرتني بصوتها

شعتني بكثر النوح ويني ووينها

شعتني وتو جروح قلبي طرية

تقاسمت نوح الحزن بيني وبينها

تنعى ولدها والغلا يبحث الخفى

وانا انعي شجاعٍ ربعته فاقدينها

صميدع ينجاز عن مسلك الردا

ويلاه تو جنازته دافنينها

تبي تدله الناقة وتنسى من البطى

وانا فجوعي مطولاتٍ سنينها

على سيف هلّي ياعيوني عبايرك

اوصيك بالعبرات لاتذخرينها

ربيع الفؤاد اللي خذ موحش القضا

اقفت به اقدار المنايا بحينها

راح الضحى مني يقضي لوازمه

والعصر جيب جنازته شايلينها

وقفت عند جنازته يدفنونها

صفقت بالكف الشمالي يمينها

من فجعة محدٍ علينا دعابها

نفس نحملها عسى الله يعينها

عز الله انه راح منا فقيده

كل الجماعه فجعته مونسينها

مرحوم يا من شام عن ماقف الردا

حفظ شرف نفسه عن اللي يهينها

هو اللي خذا مني وصاتي وضمها

واخذ من افعال المراجل سمينها

وان كان اخو وضحى مدحنا خصايله

اللي يعرفه كلهم خابرينها

يالله يا اللي ما لنا عنك مزين

يا من خذيت الروح وانك ضمينها

انك تعوضه في حياته بمنزله

في جنة الفردوس مع ساكنينها

الى كان مرضيني ومرضٍ جماعته

ونفسه تمسك في شرفها ودينها

روحٍ خذاها الله عفيفه بريه

دعينا لها بالخير ومسامحينها

وانا ممنٍ الله مانيب مشرك

وهاذي تدابير الولي عارفينها

عسى الله يعاوني على الصبر بالقضا

ونفسي عسى ربي يثبت يقينها

وروح تمنينا مشاهد خيالها

لابدّنا في وقتنا تابعينها

يالله يالمطلوب ياقايد الرجا

يامبدلٍ عسر اليالي بلينها

تعينني بالصبر وتحل كربتي

عسانا من اللي رحمتك مرتجينها

هذا وصلينا على سيد البشر

وادعوا معي بالخير ياسامعينها