في عيونك : حزن واسرار وذبول

وفي عيوني لك : شموع وكرنفال

وفي رموشك : سحر ونعاس وخمول

وفي رموشي لك : طيوف ٍ من خيال

ما ستر نظراتك الطرف الخجول

ما يتيح لصدّتك عني مجال

كل ما صديت بالرمش الكسول

تفضحك جررّرة نواعسك الثقال

كن في صوتك : رياحين وهطول

وكن في صمتك : قوافل وارتحال

وكن باغفاية هدبك : اربع فصول

وكن في سلّة نواظرك : احتلال

يوم نظراتي على زولك تجول

واكتشف وش قد طاغي هالجمال

اتمعّن بك طلوع ٍ في نزول

وما أمر من الطلوع .. الا النزال

كن في صدرك سكن ضبي ٍ جفول

لا ارتعب صارت يدينك له غلال

بارز ٍ مثل : الجموح من الخيول

ولايذ ٍ مثل : الجبان من الرجال

ايسر من / القاع الاجرد والسهول

واعسر من / الجال الاوعر والجبال

والين من / العشب الاخضر بالحقول

واصلب من / الصخر الاسمر في قبال

يفرقه .. في مفرقه .. مجرى السيول

يتسع ويضيق .. حسب الانهمال

ضاااق حتى قلت : يا قل الحلول

واتسع واردفت : .. يا كثر السؤال

لو قطعت المي عن مجراه حول :

غير تلقى به نداوه ما تزال

وخصرك اللي ينوصف فيه النحول

ناحل ٍ لا هبت النسمات مال

معتدل ، لكن هوايته : الميول

ومايل ٍ ، لكن سمته : الإعتدال

لو خلى من ثقل ردفك غير اقول : ..

طااح .. لكن حضه ردوفك ثقال

يا مرقصّهن على دق الطبول

ما تخاف الله بعيال الحلال ؟؟

كنهن خلقن من تراب ٍ زعول

نافر ٍ عن جسمك وفيه اختيال

لا مشيت تراعشن رعش الحجول

ولا وقفت تفرعنن غي ودلال

ولا انثنيت تفصّلن حسب الأصول

ولا جلست تعاظمن كبر وخِيال

مانت حي الله ولا يشبهك زول

يا مبلّغ حسنك لحد الكمال

خطوتك رقصة قمر غر ٍ عجول

فوق صدر الغيم خطواته عجال

يفهقن عنه .. ولكنه خجول

كل ما بيّن يدّور له ظلال

كيف ما تغري قصيدي يا جهول

وتحت خصرك بدر ٍ وساقك هلال

لو بكيفه وده بوصفك يطول

بس انا خايف عليه من الهبال

له عن اشعار الغزل عامٍ وحول ..

.. ستة اشهر .. لين في مرباك سال

وانت لك يا فاتني صعب الوصول

يا اجمل احلامي .. وتحقيقك محال

آآآه لو تدري بقلبي وش يقول ؟؟

يوم تقطع خطوتك حبل الوصال

تشهق انفاسي .. ويملكني الذهول ..

وتنرسم في نظرتي : كلمة ( تعال )