هلا بك يا ربيع شفت بروقه حجاب الليل

هلا بك والعيون لشوفتك في دمعها غرقى

هلا باسم الدلال اللي بداخلها يفوح الهيل

باسم جمر الغضى اللي يشتعل لا .. طروا الفرقى

باسم غر السحاب اللي سرت باسم المطر والسيل

باسم غصنٍ بجوفي غردت لك فوقه الورقى

هلا بك عزوالي برقك اللي يوجب التهليل

هلا وان قلتها لك يبتسم ثغر السما الزرقا

حبيبي لا .. لفيت اسرجت لعيونك ظهور الخيل

ولا هانت عيونٍ تجعلك فوق الهرم ترقا

عيونٍ ساحراتٍ لا .. سهج صفة هدبها الميل

يذوب اعلى جبل لا .. سلهمت له ويغدي برقا

تعال بكل مابك من جمالٍ يرفض التبديل

تعال وخل طعنة رمح عينك في الجسد تبقى

احب اقابلك واكره وداعك با حبيبي حيل

ليا صارت يميني ترتعش في كفك العرقى

اخاف اقول لك (مع السلامة) والدموع تسيل

ويذبل في الصدر عود الخزاما والزهر يشقى

تريث قبل ترحل حدد الموعد بلا تأجيل

أن (الملقى وسط) ما احب اقوله .. حدد الملقى

وتبقى لو تمادى بك غيابك فوق نجم سهيل ..

وحيد وكل عين لشوفتك في دمعها غرقى