إمتلى العالم قصايد وانا فاضي قصيد

مابقى فيني ولا بيت يغري واقصده

القمر حاول معي مالقى عندي جديد

والبلابل مالقت أي صوت تغرده

أحرث اوراقي والأوراق وقت الشعر : بيد

شفني ازرعها تعب لكن ارجع واحصده

وان نويت أبني من الحاني العذبه نشيد

ينهدم لحني عليّ قبل اسمي وانشده

لا خيالي كسر أقلامه ولاني بليد

والقصايد ماعليها شروط معقده

لكن الساحه عنيده تبي شاعر عنيد

ما تمد قيودها فيه لين تقيده

شاعرٍ وجهه طفولي وقلبه من حديد

لا نزل حوله معاني خياله مصيده

وان بغى يقرا جروحه وينزف ما يريد

تجتمع كل القوافي والأوزان بيده

..والتفت لأول قصيدي واحس اني وحيد

واذكر أول ليلةٍ شاركتني مولده

ليلةٍ كني طفل بشروه بثوب عيد

طش عيده واحتفل قبل روحه بجسده

لكن البارح كبر شوفي وكبّر بعيد

وكل ما قرب طموحي أغمض وابعده

قلت ابنسى كل ما فات وابدى من جديد

واتحرى كل حرفٍ يجي في موعده

ودي ادفن بين كل عاشق وعاشق وريد

لين احس بلذة العشق واحرث موقده

واهدي ابياتي للأحرار خدام وعبيد

وكل بيتٍ لا غفى سيده يستعبده

ياقصيدي والليالي تبي ضوٍ جديد

ليه ما اسهر واستعير القمر وآجدده

ياليالي واحتريني خيالي به قصيده

بس ادوّر له لسانٍ طويلٍ يقصده