مايقدر قيمة الشعر عبّاد النفوس

قدر بيت الشعر تلقاه في قلب الجزيل

شاعرٍ توخذ قصايده عبرات ودروس

ماتصنع فالهجيني ولا البحر الطويل

لا تأمل سبك قافه بعيدين الرموس

صفقوا له كن ماله على الدنيا مثيل

كن حبكه للمعاني على الجزل مغروس

شرّد افكاره توصّف على الظل الظليل

مابحث عن شهره اعلام وأغرته الفلوس

غير قدره راية الطيب والسيف الصقيل

فارقٍ والفضل لله حيث الروس روس

فيض موهبته لحاله يمثل شعر جيل

يا مساعد يخوا الراس من كثر الهجوس

والسنين تروح والعمر ماباقى ذبيل

الرماح اوقوف واجروحها مثل الجلوس

كن قلبي مرتع الجرح وعروقي مقيل

طالت الطرقة وغرّات دنياي العسوس

طيشها مسموم وزنادها يقدح فتيل

ليلة البارح مع الوجد والحظ العبوس

ليت لحظوظ الرياجيل يا مساعد بديل

كل مايطرق على البال طيف العيطموس

يتضح لى خف نفسي وانا والله ثقيل

عشت ياسرٍ بقلبي عن الناس محروس

حرز عن عين الحواسيد وهروج الهبيل

ماعليك اشعب ركابك ودوس البعد دوس

ما انته اول من طعني بنكران الجميل

واذكر انّى حانى الغدر عنك حنو قوس

لاتشايلك الروابع وغدرك مستحيل

مابذرتك فالحشا بذر والتفكير كوس

باذرك بذر الوفا في مواقيف الاصيل

رح وخل القلب سالمك يا حرب البسوس

واعتبرني منك مقتول والا ابك قتيل

وانتبه حدّ الطموحات كنه حد موس

لاتغيّرك المظاهر ويجرفك المسيل

لاتعيش الدور كامل وتاخذك الطقوس

ثم ترجع تالى الوقت ماعندك حصيل