تولّم للجفا خل العتاب وشرهة الخلان

على صم المشاعر ذاب صوتك يا مناديني

نسيت الصوت وأخباره ويا مالك من النسيان

من أقصى خافقي هذي علومي كان توحيني

صبرت ولا ظفرت وقلتها لك بالفم المليان

أنا ما جيتك اذرف دمعتي حتى تواسيني

أنا جيتك و لافي بالي إلا كان ياماكان

على وضح النقا تدفعني العزة وتغريني

لو انك في مداهيل الجوازي باشة الغزلان

تهون وكل دربٍ جابني يمك يوديني

حشى ما كنها صابت لواحظ طرفك الفتان

ولاكني سريت بطلتك والليل ممسيني

غلاك اللي ليا جيته زما ما يروي العطشان

لو انك في عروقي تجمعه ما عاد يرويني

على تالي مواعيدك من البارح وأنا سهران

بغيتك للسهر مثل المنام وطحت من عيني

قصر عنك البياض وغاب وجهك والوجيه ألوان

يجي يوم تدورني هناك و لا أنت لاقيني

ابد ما هيب من تالي حساباتي وأنا(ضيدان)

اليا مني رضيت بمثل هذي وش تسميني