ودك تنامين؟! نامي يا بعد عيني

باين عليك التعب من أمس سهرانه

من ليلة البارحة.. وأنت اتداريني

شوفي المراية اعيونك حيل تعبانه

نامي لك شوي لو ساعة وخليني

يا بنت عمر السهر ما يغمض اجفانه

ولاني بطاير من ايدك.. هذي ايديني

ما دام فكري معاك اختل ميزانه

لو ترخي الشال لعيوني وتنخيني

اجيك فزعة اخو ذباح لاخوانه

صومي عن الناس سمي وافطري فيني

يفداك قلب تربى بطيب جدانه

انا ظلالك ما دام الله معافيني

الله عطاك الغلا المعبود سبحانه

انا ادري انك نسفتيني.. وتلفتيني

مهما خسرتي معايه دوم ربحانه

نامي وباكر بكيفك.. طلعي عيني

القلب شرع لهمك كل بيبانه

واذا غفيتي امانة حيل غطيني

برموشك اللي من الأشواق رويانه