قالت وش احلى مايقول المحبين

ساعة لقاهم بعد غيبه طويله

قلت اصبري ، قالت انا اقولك زين

قلت اتمنى ماتكوني بخيله

قالت عسى موتي على يديك هالحين

ان كان قيلت بين خل وخليله

قلت احبكيها صح ياقرة العين

قلبي يبيها صدق تشفي غليله

قامت تفكر !! قلت يالله ، وبعدين

كن اصبعك طوّل بلفّ الجديله

! قالت كليب !! وقلت خير ! شتِقولين

قالت رجع !! وشو شعور الجليله

قلت اليمامه ! ماهي اقوى تحسين

من يوم غاب جبير صارت هبيله

وشبك سكتي ليه قمتي تلفّين

قالت اخاف ان قلت تطلع ثقيله

أخاف اقول وكلمتي تجرح الدين !!

واشيل ذنبٍ مقدر اني اشيله

استغفر الله وين وصلتني وين

وانت تعرفني والاصيله أصيله

ضمت يديني قلت توك تحنين

قالت يدينك بس هذي قليله

يوم احضنتني دمّعت ، قلت تبكين

قالت اظن الدمع (أصدق وسيله)

ردّت ، وقالت وش عذاب المحبين

قلت الغياب ! وفي عيونك دليله