ياكثرهم لا قلت لك عرفة وجيه

وياقلهم لا قلت قدر ومعزه

رجلٍ تعزه بعد ماتلتقي فيه

ورجلٍ قبل ماتلتقي به تعزه

ورجلٍ ترزه بالمجالس مباديه

ورجلٍ فلوسه بالمجالس ترزه

ورجلٍ يموت ولا يجيبون طاريه

ورجل يجي طاريه في كل حزه

ورجلٍ يهزه بعض موقف ويشقيه

ورجلٍ مهوب أيّات موقف يهزه

ورجلٍ ضعيف ويستفزه معاديه

ورجلٍ كلام اعداه مايستفزه

ورجلٍ تلزه يعترف لك بخافيه

ورجلٍ على خافيه محدٍ يلزه

ورجلٍ يوزونه ويزعل بنيخيه

ورجلٍ يزعّل من يحاول ، يوزه

ورجلٍ تكزه لا زم انك توصيه

ورجلٍ بليّا ما توصيه كزه

من لا فرش للمرجله ماتغطيه

ومن لايخز الناس محدٍ يخزه

ان كنت تعرفني فهي عرفة وجيه

مو شرط لك بالقلب قدر ومعزه