يفداك عُمري والف عُمْرٍ مع العُمْر

بس اضحكي يا نور عين القصيدة

لا تسكبي دمعك على أوجانك الحُمْر

ما أحد ينال اللي تمناه بايده

هذي تصاريف الدهر لا نِوَت الاْمر

ما تخبر احد قبل تاخذ فقيده

يفداك كل البيض.. والشّقر.. والسُّمْر

والفين بسمة والف ضحكة سعيدة

وفْداك قلبٍ تحرق ضْلوعه الجَمْر

لو تحضنينه يشتعل بك وقيده

الدمع لك دَلّه تعالي خذي تَمْر

من نخلة أحزان بعيني عنيدة

يا فتنتي من يوم زيدٍ ضَرَب عُمْرو

الين صرت اركض بصدر الجريدة

باقي أحبّك ما بقى في العُمُر عُمْر

تستاهلي يا تاج راس القصيدة