يا بعد راس العزيز المستحب من القصايد

فدوتك راس الذليل من الشعر ما قيل توّك

ما مدحت الاّ انت والاّ ابوك والاّ الشيخ (زايد)

ولايطاول هالثنين بهالعلو الا علوّك

جيت ابارك جيت اهني جيت اغني جيت اعايد

والشعور اكبر من التعبير واصغر من سموّك

بارك الله فيك شاعر.. بارك الله فيك قايد

بارك الله في مخاييلك وبرّاقك ونوّك

وسلط الله نقمته في وجه هرّاج النقايد

كانه استكثر محبة صاحبك والا عدوّك

كيف ما تنحب يا المفنود وفعولك فرايد

تشهد انك من قديم وتشهد انك بعد توّك!!

بالقديمات القديمة والجديدات الجدايد

ما انغلب طيبك بطيب ولا غِلِب في السوّ سوّك

يا ثنائي النور والنار وتوازنها المحايد

شبّ للصدقان ضيّك، واحرق المبغض بضوّك

مدها يمنى على تصفيقها تلفي الشرايد

كنّها ذودٍ ظوامي يمّمت مورد حنوّك

الله الله وانت مثلك ما يوصى.. أنت رايد

كلمتك لا قلتها ما لحقها (ليتك) و(لوّك)

ما خلقك الله من اللي همهم كبر الوسايد

انت من قوم ٍذيابه كنْ وسايدهم تشوِّك

الله الله في (دبي) وهالله الله في القصايد

لا يعكّر يا طويل العمر كثْر الشغل جوّك

ولو (رئيس المجلس التنفيذي) اصغر منك وايد

بس اهنيك بثقة ليث العروبه في سموك