جيت أطلب الفرقا وعلمي سَلامتْك

ما عاد لي في سيرة الحب طاري

ما عاد تخدعني بسحر ابتسامْتك

طلّقت لا انساها واطالب بثاري

ما جيت أبى لومك ولا ابغي ملامَتْك

أدري من المخطي وحتى انت داري

جيت أعتذِرْ لك عن خطيّة محبّتْك

واستسمحك من ذنب طول انتظاري

واخيّرك في قتل ماضي مودّتْك

والاّ تعيش برغبتي واختياري

ذلّك يعوّضني عن أيّام عِزّتْك

واقل ما في الأمر رَدّ اعتباري

أبيك تلقى ما لقيته بعشقتْك

وتلبس بدل عزّتك ذل اعتذاري

الين تنسى وجه لحظة ولادتك

والخطوه اللى جت برجلك لداري

أيّست من لذة غرامك وجَنّتْك

تعال جَرِّب حر نار احتضاري

واذا قست ناري وعيّت وصدّتْك

لك ألف ذنبٍ تشفع لْذنب ناري

هذي علوم الصدق جتْك وتعدّتك

عطني قرارك وانت هذا قراري

العلم جاك .. اللى سمعت وسلامَتْك

لا عاد يطري لك على الوصل طاري!