يالله بأمانك مابقى لي صبر و انت المستعان

بيديك صبري و أنت يا ربي على هذا قدير

ألهمني أكبر صبر يكفيني أذا (نشف) اللسان

و اليا أنكسر عودي و صار الوضع في قلبي خطير

هذا و انا عبدك قليل الحيل في وجه الزمان

كبير فعيون الأوادم بس قدامك صغير

مؤمن بما يجري على قلبي اذا حان الأوان

أستغفر الله كنٌها ( قصه ) و أنا ( الفصل الأخير )

قمت اتلمس فوق صدري لين حددت المكان

اللي شهد قصة لقاء السندريلا و الأمير

ياسندريلا قلبك أجمل قلب و أغلى شيء كان

حلم و تحقق يوم جيتي ماهقيت انه يصير

معاك أحس انه نبت لي قلب من عطف و حنان

و معاك أحس أني أصير انسان ما قد شاف خير

شاعرك شاعر مامعه غيرك سوى السحر البيان

و أن رحتي و راح البيان يصير شاعركم فقير

صدري فداك وفدوتك و القلب معطيك الأمان

و العرش ملكك و أعتقد :( مافيه داعي نستخير )

أنا مسامح و أنثني لك مثل عود الخيزران

و أنتي من الضلع القصير جروح للضلع القصير

يوم الزمن كله قساوه جيتي لقلبي ليان

في وقت كان الناس غير و كنت انا من الناس غير

من يوم قلتي يا هلا كنك عطيتيني ضمان

عن جرح قلبي يوم أطير لك طيوره طير طير

خلي عطاياهم لهم و أخذي عطاياي السمان

العقل و كفوف الحنان و عيشة القلب الكبير

تنبت لك ضلوعي غلا و يفوح ريح الزعفران

و أضما حنانك و أشربه و أقول : مشكوره كثير

صح الله لسانك صحيح الحر ماله بالطمان

و الحر انا وكري ضلوعك كيف أخليها و أطير

لو ما جمعني لك غلا ما صار للكائن كيان

و لا عرفت اني على هذا و لا هذا جدير

سبحان من سواك خلطه بين ورد و قحويان

و سبحان من اعطاك حكمه عند تحديد المصير

سبحانه اللي له نقيم الفرض و نصوم رمضان

جعل رمضان يعود و أنتي يا بعد راسي بخير

يا سندريلا ما بقى بالقلب موعد غير حان

على حسب توقيت ضلع الشوق في صدر الأمير